На 20 септември во 20 часот, Охрид беше домаќин на промоцијата и отворањето на изложбата на карикатури. 50 карикатури – добитници на највисоката награда на секоја од 50-те изданија на Светската галерија на карикатури Скопје од 1969 – 2019, ќе бидат изложени до 3 октомври во Музеј „Куќата на Робевци“. Со оваа изложба, Светската галерија на карикатурите, Остен, слави 50 години постоење. 

Остен

Благодарејќи на професионалното организационо обликување на Светската галерија на карикатури од страна на членовите на Редакцијата на македонскиот хумористично-сатиричен весник „Остен”, од 1969 година, Скопје прераснува во град-мека на светската карикатура и тоа трае веќе 50 години!

„Стварноста на времето во кое живееме ја замени карикатурата. Реалноста е карикатурална, но не на интересен, критички и конструктивен начин како кај карикатурата. Јавната комуникација е полна со навреди, омраза, што е одраз на сопствените фрустрации, стравови, несигурност и неподнослива леснотија на неодговорноста за пуштената мисла во етерот.

Карикатурата е уметност на пренесување пораки. Оттука артикулацијата на критичката мисла сублимирана во визуелна порака е вистинскиот атрибут на карикатурата што треба да се негува, да се надградува и да се усовршува. Во јавната комуникација денес како да недостасува артикулација, затоа – крајно време е да ја вратиме карикатурата на вистинското место!“ велат од Остен.