Иако некои шампиони го достигнале врвот со комбинација на идеална генетика и многу работа и посветеност, сепак тешко се одржува совршена фигура. Останатите се бориме со чести физички недостатоци, некои вродени , а некои стекнати од незнаење, игнорирање или недостаток на внимание. Не постои решение со кое ќе исчезнат овие недостатоци, но има решение како да ги направиме неприметливи.
Недостаток бр. 1
Имате крупен, голем горен дел на тело, а тенки нозе
Ова е најчестиот недостаток кој сигурно сите сте го приметиле во вашата околина. Особено е чест кај луѓе кои вежбаат со тежини. Повеќето мажи сакаат да вежбаат гради и раце. Грбот и рамото се на второ место.
Доколку се случи да мора да прескокнат некој тренинг од оправдани причини, тоа сигурно ќе биде денот за вежбање на нозе. Резултатот од сето ова после подолго време ќе биде крупен моќен горен дел на тело како додаден на нечие туѓо тело со тенки и слаби нозе.
Како да се поправи ова? Вежбајте нозе! Не еднаш туку два пати неделно. Ефективниот тренинг за нозе не е воопшто едноставен. Бара сила и енергија, но затоа ќе има добри резултати. Препорачувам: клекнувања, ножна преса, шут, ножен прегиб, мртво подигнување и вежби за лист. Со тек на време, долниот дел на телото ќе изгледа мускулест и изработен баш како горниот дел на телото.
Недостаток бр. 2
Широк струк
За ова се криви вашите родители, структурата на коските е потполно генетски предодредена и ваше е да изградите мускули на нив. Идеалната градба на тело ја има формата на буквата V – широки рамена и горен дел на грб што се стеснува надолу. Не сите се надарени со ваква градба.
Како да се поправи ова? Како претходно што спомнав, коските ни се дадени, она на што може да влијаеме е мускулното ткиво. Она на кое што во овој случај треба да се работи е рамо и горен дел на грб до момент кога ќе се изгради поширок рамен дел кој се стеснува накај струкот.
За да добиете широк горен дел на грб треба да изработувате многу згибови со широк фат и лат влечење на долу со обратен фат. Додека убавите оформени рамена ќе ги добиете со летање во страна со еднорачни тегови, машини или сајли и веслање за задно рамо нагоре со широк фат со шипка или еднорачни тегови.
Недостаток бр. 3
Гради натежнати надолу
Потисокот на клупа одсекогаш била вежба број 1 за градните мускули. Тука има еден проблем кој се јавува често. Доколку некој се фокусира целосно на изработување на вежби за гради на рамна клупа, а ги заборави другите вежби за гради, може да се случи горниот дел на градите да изгледа рамно. Со таков тренинг подолго време, ќе се изгради мускулна маса во долниот дел која ќе виси и ќе даде лош изглед на целите гради.
Како да се поправи ова? Најнапред започнувајте ги вежбите за гради со вежби за горен дел на градите – потисок со шипка или еднорачни тегови на коса клупа, па одете на рамна клупа. Доколку визуелно се гледа голем дисбаланс на долниот и горниот дел на градите, некое време треба да се задржите најмногу на потисок и развлекување на коса клупа, машина за развлекување или cross over со сајли.
Не грижете се дека со ваков тренинг ќе страда долниот и средниот дел на градите. Доволно стимулација ќе добијат градите и од погоренаведените вежби. Бидете упорни и за брзо време сите ќе приметат разлика во вашиот изглед.
Недостаток бр. 4
Изгледате многу меко и млитаво
Секогаш има некој во фитнес клубот кој само додава тежина на машините за вежбање и никогаш не успеал да ги исчисти вишокот масни наслаги. Всушност кога ќе се каже дека ни е период за зголемување на мускулна маса, точно е дека е потребен поголем внес на калории, но повеќето јадат многу повеќе од што е потребно. Често и го избегнуваат кардио тренингот со страв дека така ќе ги потрошат екстра калориите потребни за зголемување на мускулната маса. Резултат на сето ова е меко на изглед олабавено тело со мускули прекриени со масни наслаги.
Како да се поправи ова? Најпрво средете ја исхраната. Дури и кога сте во период на зголемување на мускулната маса, период на полнење, престанете да јадете хамбургери, колачи, торти и пици. Започнете со јадење на свежо приготвена печена или на скара приготвена храна како пилешко, мисирка, риба, сладок компир, ориз, јајца, овес и многу свеж зеленчук.
Намалете ги јаглехидратите на онолку колку што ќе ви дадат доволно енергија за квалитетен тренинг и добро пумпање. Внесете кардио тренинг после кревањето на тегови. Доволно е 20-30 минути трака, орбитек, степер или што и да ви прави најголемо задоволство. За краток период ќе забележите огромна разлика во изгледот на вашето тело.
8 основни вежби за истегнување на телото
- Вежба за истегнување на квадрицепс
- Вежба за истегнување на задната ложа на ногата
- Вежба за истегнување на внатрешниот дел од нозете
- Вежба за истегнување на градниот кош
- Вежба за истегнување на рамениот дел
- Вежба за истегнување на трицепс
- Вежба за истегнување на вратот
- Вежба за истегнување на стомакот
Придобивки од вежбите за истегнување:
- Се намалува ризикот од повреда
- Се зголемува циркулацијата и се подобрува снабдувањето на зголобовите со хранливи супстанции
- Се зголемува координацијата
- Се намалува ризикот од болки во грбот
- Се подобрува балансот на телото
- Се опуштаат мускулите
- Ќе се чувствувате релаксирано.
